१. सनागुठी:-

थुगु विहारया सर्वसंघया दाजुकिजापिं मुना संघया सुंनं दुजः देहावसान जुइवले उम्हसित दाहसंस्कार यानावनेगु हेतुं थन सनागुथि  (सनाथ गुथि) नीस्वानातःगु जुल । भुतूप्वालं छम्हया ल्याखँ थुगु गुथिइ गुथियार  जुयाः पालंपाः गुथिपाः फयेमाःगु थुगु गुथि प्रत्येक  दँया फाल्गुणकृष्ण चतुर्दशी –लखुं च-हे ) कुन्हु सकलें मुना दिगीइ पूजा यानाः भोजन यानावयाच्वंगु दु ।
PDF download

 

२. विचाःगुठी :-

थुगु संघया थःथितिपि सुं देहावसान जुलाधाःया  उम्ह मदयावंम्हसिथाय् वनाः विचाः संचाः यावनेगु हेतुं संघया दुजःपिं मुनां थुगु गुथि दयेृकातःगु खः । थुगु गुथिया सुंगुम्हसिया थःथितिपिं देहावसान जुलधाःसा उम्ह गुथियारं विचाः हायेृकेमाः । प्रत्येक दँया भाद्रशुक्ल पुन्हीं (येंद्यापुन्ही)  कुन्हु थुगु गुथि हनावयाच्वंगु खःसां थनिं १५ दँ न्ह्यःनिसें थुगु गुथि व सनागुथि निगुलिं छगू हे यानाः मृत्यु संस्कार गुथि नामाकरण यानाः येंद्यापुन्हि कुन्हु हे गुठि हनेगु यानावयाच्वन ।

 

३. आचार्य गुठी :-

थुगु विहारया संघया दुजःपिं मध्यय् वज्रभिषेक –आचार्य लुइगु) कायेधुंकूपिं सकलें मुनां आचार्यगुथि हनावयाच्वंगु दु । थुगु गुथिया गुथियारपिं धयापिं हे आचार्य लुइधुंकूपिं सकलें खः आचार्यगुथिया गुथियारपिं प्रत्येकसिनं थुगु गुथिपाः खसिंकथं फेयमाःगु जुल। चैत्रकृष्ण प्रतिपदा करुणामय न्हवं कुन्हु श्रीवज्रसत्वया आराधना यानाः गीतार्चनपूजा एवं दर्शन यानाः समे  प्रशाद कयाः भोजन समेत यानाः थुगु गुथि  हनावयाच्वंगु दु ।

 

४. द्यःपा गुठी :-

थुगु विहारया सकल संघया दुजःपिं मुनां गुथियार जुयाः द्यःपाःगुथि हनावयाच्वंगु दु । क्वापाःद्यःया थाय् द्यःपाः च्वनीपिं संघया दुजःत मुनां हनीगु गुथि जुया हे थुगु गुथियात द्यःपाःगुथि धाःगु खः । थुगु गुथि पौष शुक्ल पंचमीया दिनस क्वापाःआजुयागु पूजा अर्चना यानाः पूजां लिपा भोजन यानाः हनांवयाच्वंगु दु ।

 

५. दाफा गुठी :-

थुगु बिहारय् विराजमान जुयाविज्याःम्ह मूद्यः भगवान्या सन्मूख च्वनाः संल्हू, अष्टमि, पुन्ही आदि, अथेहे गुंला लच्छि व कार्तिक लच्छियंक दाफा भजन व ज्ञानमाला भजन न्ह्यानावयाच्वंगु दु । थुगु गुथि हनेगु कथं गुंलापारm कुन्हु सुथय् बुद्ध पूजा याना न्हिनय् धर्मागार दिगीइ विराजमान जुयाविज्याःम्ह श्रीपद्मनृत्येश्वरयागु पूजार्चन यानाः प्रशाद स्वरुपभोजन यायेमाःगु चलन दु । थुगु गुथिया गुथियार, मृत्युसंस्कार गुथिया हे गुथियारपिं खःसा छेँखा लिनां छसिकथं पाःफयाः थौं तकं गुथि हनावयाच्वंगु जुल ।

 

६. महाकाल गुठी :-

क्वापाःदेगःया खवय् स्थापना यानाःम्ह श्रीमहाकाल देवताया नामं हनीगु गुथि हे महाकाल गुथि खः । थुगु गुथिइ संघया सकल दुजःपिं हे गुथियारपिं खः । मोहनीया नवमिपूजा कुन्हु श्रीमहाकालया थाय् ६४ जाबलि सहित आराधना यानाः गीतार्चनपूजा आदि यानाः थुगु गुथि हनावयाच्वंगु जुल । थ्वकुन्हु सकसिनं समे कयावयाच्वंगु जुल । थुगु गुथिपाः थकालि कथं निम्ह निम्ह सिनं पाः फयावयाच्वंगु जुल।

 

७. नसंचा गुठी :-

क्वापाःद्यःया सन्मूख नसंचा ईलय नामसंगीति ब्वनीपिं छपुचः मुनां थुगु गुथि हनावयाच्वंगु जुल । दच्छियंक नामसंगीति ब्वना श्रावणकृष्ण अपमाइ कुन्हु भोजना याना थुगु गुथि हनीगु खः ।

 

८. नामसंगीति गुठी :-

नसंचा गुथि थें हे नामसंगीति ब्वनीपिं मुनां गुंलापारु कुन्हु गुथि हनावयाच्वंगु जुल । थुकीयात नामसंगीति गुथि नाम बियातःगु जुल ।

 

९. तुतः गुठी :-

क्वापाःद्यःया सन्मुख न्हियान्हिथं सन्ध्या ईलय् तुतः ब्वनेगु नं थन न्ह्यानावयाच्वंगु दु । तुतः ब्वनीपिं  छगू समूह मुनां दँय् छको मार्गकृष्ण पञ्चमि कुन्हु तुतःगुथि हनां भोजन यानावयाच्वंगु दु ।

 

१०. संल्हु गुठी :-

श्रीआर्यावलोकितेश्वर करुणामयया थाय् प्रत्येक  महिनाया संल्हु कुन्हु पिण्डपात्र दोहलपियाः पूजा यानाः थ्व कुन्हु गुथि हनावयाच्वंगु दु । थुगु गुथि थन दुगु स्वंगू खलः –मात्र, लाखे, दत्त) या थःथःगु समूह  मुनां हनाच्वंगु जुल । अथेहे प्रत्येक अष्टमी –लय् व बाय्यागु) कुन्हु श्रीअमोघपाश लोकेश्वरया जवगु पालिइ पिण्डपात्र दोहलपियावयाच्वंगु नं जुल । थुगु गुथि वन्धुदत्त वज्राचार्यया म्ह्याय्या सन्तानपिनिपाखें न्ह्याकावयाच्वंगु खःसां आः वया थनया पुक्षे खलःयापिन्सं न्ह्याकावया च्वंगु जुल।

 

११. दँ पारुगुठी :-

बैशाखशुक्ल प्रतिपदाया दिनस श्री आर्यावलोकितेश्वर रथारोह कुन्हु रथय् विराजमान जुयाविज्याकेत करुणामययात जनीचिकेत जनीकापः तयाः श्रीकरुणामय यागु पूजा यानाः न्हिने पुक्षेय् च्वंगु आगमय् गीतार्चन पूजा यानाःथुगु गुथि हनावयाच्वंगु खः । थुगु गुथि भिन्छेबाहाःया कचावाहाः ज्ञानचन्द्र महाविहारय् च्वंपिं बज्राचार्य पुक्ष खलःपिनिगु समूह पाखें न्ह्याकावयाच्वंगु जुल । थुगु गुथियात करुणामययागु प्रशाद स्वरुप ज्यावलापूजा कुन्हु मरिचरि, फलफूल आदि व दां स्वंगः (३पैसा) दस्तुर विइगु चलन दु ।

 

१२. बसुवा सेवा गुठी :-

प्रत्येक दँया फागुनशुक्लया न्हापांगु बृहस्पति बार (बसुवा) कुन्हु श्रीयोगाम्वरयागु पूजा वसुवा सेवा गुथि हनावयाच्वंगु दु । थुगु  गुथि संघया दुजःपिं मधयय् छथ्वः मुनां न्ह्याकावयाच्वंगु जुल ।

 

१३. यःसिं गुठी :-

श्रीस्वयम्भू ज्योतिरुप उत्पति जूगु दिं कतिपुन्ही अले श्रीस्वयम्भू महाचैत्य प्रतिष्ठा जूगू महान पर्व सकिमनापुन्हीया लुमन्तिइ श्रीस्वयम्भूयात दीपावली उत्सव कथं आकाशदीप च्याकेगु चलन दु । थ्वहने झ्वलय् थुगु विहारय् नं थ्व दिंया संस्मरणय् यःसिं स्वानाः मत विइगु ज्या न्ह्यानावयाच्वंगु दुस । थन  चीहाकःगु व तःहाकःगु याना निगः यःसिं थनेमाःगु चलन दु । थुगु यःसिं विहारया ननि पाखे स्वाइगु खः । कार्तिकपुन्ही कुन्हु यःसिं थनां लच्छियंक मत बियाः सकिमना पुन्हीया सतिकुन्हु यःसिं कोथलेगु ज्या याइ । चीहाकःगु यःसिंया गुथि थन संघया दुजःपिं मध्यय् छथ्वः मुनां हनाच्वंगु दुसा तःहाकःगु यःसिंया गुथि थनया मृत्यु संस्कार गुथिया सकल गुथियारपिं मुनां माःगु व्यवस्था यानारु हनावयाच्वंगु दु ।

 

१४. स्तूप –थूर) गुठी :-

थुगु विहारया लिक्क च्वंगु स्तूप –थूर) तेताथूरयागु संरक्षण एवं सम्वर्धनयालागी दँय्दसं थुर गुथि न्ह्याकावयाच्वंगु जुल । थुगु गुथि प्रत्येक दँय् कतिपुन्ही सतिकुन्हु थनया पुक्षे खलः व मन्त्र खलःया दुजः पिनिगु छगू समूह मुनां हनावयाच्वंगु दु ।

 

१५. संघ भोजन संभ्वय्) गुठी :-

दँय्दसँ बैशाखपुन्ही व माघशुक्ल द्वादशी कुन्हु म्हेखुसिइ वनां द्यः लानां (भगवान बुद्ध क्वापाःद्यःयात म्हेखुसिइ लानाहयेगु थनया परम्परा कथं) द्यः स्वरुपयगु कलश लसकुस यानाःविहारय् दुतहयाः अजिपिनिपाखे झिनिब्व जाब्व तयेकाः होमार्चन सहित पूजा यानाः थ्व गुथि हनावयाच्वंगु दु । न्हापा संघया सकल दुजःपिन्त प्रशाद स्वरुपभोजन याकावयाच्वंगु जुल । थ्व हे झ्वलय् थुकिया दाता मन्त्र खलःया कमलानन्दआजु व विद्यालक्ष्मी अजिया नामं बैशाखपुन्ही कुन्हु बहनि श्राद्ध यायेग नं चलन दनि ।

 

१६. जीगः गुठी :-

आजुपिनिगु गुथि अन्तर्गत थुकिया विरण उल्लेख जुइधुंकूगु दु ।

 

१७ गातिला गुठी :-

दँयदसं भाद्रकृष्ण तृतीया कुन्हु श्रीवसुन्धरादेवयागु  व्रत दनां कन्हे कुन्हु कुमारीपूजा यानाः प्रसाद ग्रहणया रुपय् भोजन यानाः गातिला गुथि हनावयाच्वंगु जुल । थुगु गुथि थनया पुक्षे खलःया दुजःपिं मुनां हनावयाच्वंगु जुल ।

 

१८.थन कार्तिकशुक्ल अष्टमि मुखाष्टमि कुन्हु संघया दुजःपिं मुनां विहारया प्राङ्गणय् अष्टमि व्रत दनेगु चलन दु । व्रत दनां कन्हय् कुन्हु अर्थात् युगादि नवमि कुन्हु विहारय् होर्माचन सहित पूजा यानाःथुगु गुथि हना वयाच्वंगु जुल । न्हापा थुगु गुथि थनया छथ्वः श्रद्धालुपिं मुनां न्ह्याकाच्वंगु खःसां अनपिन्सं थुगु कार्य त्वःतूगु जुयाः थुज्याःगु पुण्यकार्ययात मन्हंकूसे थनया टोल सुधार समितिया ग्वसालय् छुं दँ न्ह्याकूगु खः । लिपा थुगु गुथि विहारया श्रद्धालु श्री इन्द्रराज बज्राचार्यया धर्मचित्त उत्पत्ति जुयाः थः याकचां हे गुथि हनेगु भाला कयाः अष्टमि व्रत दंकेगु ज्या आःतकं मदिक्क न्ह्याका वयाच्वंगु जुल ।

 

१९ कन्यासेवा गुठी :-

थुगु कन्यासेवा गुथि दँय्दसं पौषकृष्ण चौथिया दिनस हनावयाच्वंगु दु । थ्व कुन्हु चःपतय् च्वंम्ह गणेद्यः –चःपः गणेद्यः) पूजा यानाः हनावयाच्वंगु जुल ।

 

२० विश्वकर्मा गुठी :-

थन विहारय् नीस्वनां तःम्ह श्रीविश्वकर्मायागु नमां थुगु गुथि हनावयाच्वंगु खः । थुगु गुथि सिथिनखः कुन्हु गीतार्चन सहित श्रीविश्वकर्मायागु पूजा याना हनाच्वंगु जुल । संघया दुजःपिं मध्यय् छथ्वः मुनां थुगु गुथि न्ह्याकावयाच्वंगु जुल ।

 

२१. दशहरा गुठी :-

मयूरवर्ण महाविहारया क्वापाःदेगलय् स्थापना यानातःपिं सप्ततथागतयागु प्रतिस्थापना यानाःगुया संस्मरणय् प्रत्येक दँय ज्येष्ठशुकल दशमी कुन्हु होमार्चन सहित पूजा यानाःदशहरा गुथि हनावयाच्वंगु दु ।थुगु गुथि पुक्ष खलःया छगू समूह मुनां हनावयाच्वंगु जुल।

 

२२. सौगः पंमाय् गुठी :-

यल, सौगःत्वाःया प्रधान खलःपिनिगु छगू समूह मुनां दँय्दसं भाद्रशुक्ल नवमिया दिनस दिगीइ विराजमान जुयाविज्याःपिं श्रीचक्तसंवर व श्रीवज्रवाराही देवीदेवतापिनिगु पूजा यानाः थनया दशस्थविर आजुपिन्त  पूजार्चन याना भोजन याकाः थव गुथि हनावयाच्वंगु जुल ।

 

च्वय् उल्लेखित  गुथिया नापनापं थनयापिन्सं न्हापा मेमेगु गुथि नं हनावयाच्वंगु दुगु खः । आ थन मदयावनेधुंकूगु गुथियागु बारे संस्मरणया लागी जूसां संक्षिप्त उल्लेख यानागु जुल ।

 

१. भंसाः गुठी :-

थनया दिगीइ प्रतिस्थापित अजिमाद्यः हारीतमाताया थास गीतार्चनपूजा यासे पौषशुक्ल द्वितीयायादिनस थुगु गुथि हनीगु खः ।

 

२. धकिं गुठी :-

पौषशुक्ल अष्टमिया दिनस दिगी आगंया न्ह्यःनेच्वंगु धकिं (श्री चण्डमहारोषण) पूजा यानाः दशस्थविर आजुपिन्त भोजन याकाः हनावयाच्वंगु थुगु गुथि मन्त्र खलःया छपुचः मुनां हनीगु खः ।

 

३.मंगलवा सेवा गुठी :-

प्रत्येक महिनाया न्हापांगु मंगलबार कुन्हु मन्त्र खलःया छपुचः दुजःपिं मुनां भिन्छेबाहाःया स्थान गणेद्यःया थास गीतार्चनपूजा यानाः हनीगु खः ।

 

४. लँज्या गुठी :-

यल पञ्चदान प्यन्हुन्ह्यवः थनया सकलें संघ मुनां विहार, ननिइ सुचुपिचु यायेगु व थ्व गुथि कुन्हु सुचुपिचु यायेगु ज्यायाःपिन्त आजुपिनिगु पाखे) बजि नकेत लोसाधासा जक विया बजि थःथःपिन्स ज्वनाः नःवनां हनीगु ।

 

५. पञ्चताल गुठी :-

श्रीबालकुमारी द्यः जात्रा यानाहइगु दिं कुन्हु पञ्चताल थानां लँस्वःवनेगु नितिं थुगु गुथि दयेकातःगु खनेदु । पाहाँच~हे सतिकुन्हु क्वाछेंया श्रीबालकुमारीयागु जात्राया दिनस वसपोलयात पूजा यानाः बहनि द्यः जात्रा यानाहइबलय् पञ्चतालथानां लँस्वःवनेगु यानाः थुगु गुथि हनीगु खः । थुगु गुथि मन्त्र खलः व पुक्षे खलःया दुजःपिं मुनां हनावयाच्वंगु खः ।

 

६. च-हे पूजा

थनया संघया छपुचः दुजः पिं मुनां प्रत्येक महिनाया च~हे कुन्हु श्रीबालकुमारी द्यःया थाय् चापूजा यानाः प्रशाद स्वरुप समे नयेगु यानाः थ्व गुथि हनावयाच्वंगु खः ।